شوية نقانق

من ذكريات تانيه كليه :) 

 دول كده شوية حاجات تهيسيية كتبتها .... ايه رأيكم ؟؟؟
دى مجرد حالات تصوريه :D
1-
واحد حيران 

يا ناس أنا سهران ....... أيوه انا حيران
مش عارف أعمل إيه ........ وإزاي وامتي وليه
كالعاده بصحي من النوم ...... و لا بسكت ولا بنضف الروم
انزل اتصور صوره ....... ولا ألعب شوية كوره
 اقرا من باب العلم ....... ولا اقعد اتفرج علي فيلم
خلاص ده وقت الغدا ....... بس البرنامج اللي بحبه ابتدى
انزل النادي وأعوم ....... ولا كالعاده اقضيها نوم
طب اعمل تمارين و ابقي فيت ...... لأ هأنتخ و اقعد ع النت
هقضيها منتدي ولا فيس ...... ولا ميل و هاي و بيس
ولا اقولكم انا رايح اتعشي ...... ولا الاحسن انزل اتمشى
بصراحه كده توماتش ..... انا رايح اتفرج ع الماتش
نازل اشتري التذاكر ....... ما هو كله إلا إنى أذاكر
أصل دي بقي طبيعة الشباب ...... مبيحبش يفتح كتاب
و انا بقى بالذااااات ..... المذاكره عندى مات
حد يساعدني بليز ...... انى اعمل شئ لذيذ
اطلع فيه طاقتي ........ أسلى بيه وقتى



2- واحد صالح


خلاص انا قررت ...... خلاص انا فكرت
هحاول ابقي صالح ..... و ابعد عن بتوع المصالح
هبدأ اعمر في الارض ..... و مش هفوت ولا فرض
عارف ان التغيير بإيدينا .... فهتبع سنة نبينا (ص)
هساعد الشخص الغريب ..... و امش علي خطي الحبيب (ص)
في العلم هحاول أنوع ..... و هصلي و اصوم تطوع
هخلي نيتي صافيه ..... و مش هاخد حاجه بالعافيه
هبعد عن العاصي الرخم ..... و كمان هصل الرحم
بعد ما كان حالي يبكي ..... دلوقتي بفلوسي هذكي
نويت احفظ قرآن ..... و في ذنوبي مبقاش غرقان
هبطل موسيقي و أغاني .... و اسعي للجنه اسمي الاماني
هعمل خير و اعمال مثمره ..... و اطلب من ربي المغفره
هقولها مس الشرق للغرب .... اللهم اهديني ياااااااااااااااارب


3- واحد طايش 

خلاص انا فكرت ........ خلاص انا قررت
حياتي هي مدينتي ....... لازم اعيشها براحتي
اصحي وقت ما اعوز ..... انشاله الدنيا تبوظ
تضرب تقلب مش فارقه ...... مادام دماغي رايقه
خلاص اللي هيجيب سيرتي ..... هقلبها معاه ديرتي
انا و المذاكره افترقنا ..... و اللي مش عاجبه يطرقنا
نويت اتصرف بمذاجي ..... و اعرف سوسو و ريري و ساجي
ان شاله اقرا مجلة ميكي ..... او حتي اسمع انريكي
او الدنيا زي المرجيحه ...... و نقعد علي قهوه مريحه
نقلبها قعدة صريحه ...... و نداوي حياتنا الجريحه
و ارجع بيتي وقت ما احب .... و اتفرج علي فيلم dvdrip
من الاخر هعيشها بحريه ..... و ازود تجاربي الشخصيه

4- واحد تاايه
أنا تايه من نفسي ..... معدش حيلتي غير يأسي
الدنيا شدا حيلها عليا ....... و معدش في حاجه في ايدياال
حياه بقت متفشكله ...... و كل ساعه يطلعلي مشكله
كل ما أحل أزمه ...... تيجي و تديني بالجزمه
يا دنيا من قلبي انا كاتب ...... عشان ألومك عليكي انا عاتب
بقي اللي يحبك و تحبيه ...... فجأه تديله ضهرك و تسيبيه
طاب قوليله هو ده كان ذنبه ...... و مايلقيش حد جنبه
محدش حاسس بيا ....... حتي اقرب الناس ليا
اصعب احساس من غير تفكير .... الوحده وسط ناس كتير
الايام خلاص سدت نفسي ...... وبقيت دايما ظالم نفسي
قلبي مليااااان دموع ..... و عيني رافضه الخضوع
و برسم ضحكه كدابه ..... ما بينها مشاعري القلابه
لوحدي حاسس بهمي ...... و مع غيري بستخف ف دمي
املي في ربنا كبير ..... ان الايام دي هتعدي علي خير
و بداري زعلي بهرج ...... ده الصبر مفتاح الفرج

سألوني عن

سألوني عن

السياسه في مصر ممكن تبوظ ؟
قولتلهم اللي ملهومش فيها


اكتر حاجه فرحتك السنه دي ؟
قولتلهم و انا بسمع خطاب التنحي كنت بتشقلط في البيت


صوت مصر ؟
قولتلهم منير

سألوني عن اسهل حاجه ممكن تعملها ؟
قولتلهم الكسل


اشهر شخصيه في ٢٠١١ ؟
قولتلهم حزلئوم

روعة السينما السنه دي ؟
قولتلهم انسبشن


سألوني عن اروع مشهد ع الشاشه السنه دي ؟
قولتلهم تحية المجلس العسكري للشهداء


يعني ايه غنا مختلف ؟
قولتلهم يعني بلاك تيما


الفرق بينا الاهلي و الزمالك السنه دي ؟
قولتلهم ان الزمالك بيدخل فيه أجوان بسهوله


يعني ايه كاتب فاهم الشباب ؟
قولتلهم عمر طاهر


طيب و يعني ايه واحد دماغه متكلفه ؟
قولتلهم يعني بلال فضل


سألوني عن
يعني ايه صدمه كهربائيه ؟
قولتلهم يعني الزمالك مايخدش الدوري

مين بتحبه ع الشاشه ؟
قولتلهم مكي


طيب مين بيخليك تقفل التلفزيون ؟
قولتلهم علا غانم


سألوني عن التأمل ؟
قولتلهم ورقة الامتحان

مين احسن لاعب في الدوري ؟
قولتلهم شيكابالا

سألوني احسن حدث رياضي في ٢٠١١ ؟
قولتلهم ميلان اخد الدوري بعد ٧ سنين - بشرة خير -

و الأسوأ ؟
مانشستر اخد الدوري

يعني ايه رزق الهبل ع المجانين ؟
يعني واحد اسمه شريف يقدم برنامج ساعه مع شريف ع المحور


يعني ايه خليها علي الله ؟

قولتلهم يعني المذاكرة حاجه و الامتحان حاجه تانيه خالص


يعني ايه عسوله ؟
قولتلهم Chloe mortez


طيب و يعني ايه سذاجه ؟
قولتلهم يعني كل من راح مظاهره افتكر نفسه ثوري و عاش الدور


سألوني عن يعني ايه هداف ؟
قولتلهم يعني ميسسي يجيب 53 جون في 55 ماتش و يعني كريستيانو يجيب 40 جون فى الدوري

نخوره في المخ

كنت اتجول داخل موقع goodreads اذا بجمله تجذبني و هي مقوله ل دكتور سلمان العوده تقول " القراءه هي متعة التجول في عقول الاخرين دون الاضطرار لتحمل رعونتهم " . فوجدت نفسي مقتنع جدا بهذه المقوله حقا حينما اقرأ مقال لكاتب فأنا اتجول داخل عقله او روايه حتي انت يا من تقرأ المقال الان فانت تتجول داخل عقلي - يا سعدك يا هناك - حقا التجول داخل العقول ربما يكون من اروع الاشياء بهذا العالم خصوصا انه بلا استهلاك وقود :)

ثم قررت ان اتجول داخل عقول بعض الناس اي بمعني عام انخور في دماغهم و قد بدأت بالشخص الذي اعشقه .. انه ستيف جوبز فذهبت لكي اشتري كتابه منها التجول في عقله ومنها قراءة كتاب بالغه الانجليزيه التي نادرا ما أفعلها .. و اذا بي اشتري الكتاب فوجدته ب 233 جنيه و لكن التجول كده بوقود و غالي كمان فأجلت موضوع كتابه ده لحد ما اسأل عليه في مكتبة كتب تانيه من غير جمارك :D

و لكني استمريت في النخوره داخل عقول الاخرين ما اختلف معاهم فكريا قبل من اتفق معاهم فكريا و في جميع المجالات فكرة التجول داخل العقول ربما وجدتها اكثر امتاعا بكثير من فقرة القراءه نفسها فأنا أأخذ ما يحلو لي من فكر من يحلو لي و عودت نفسي ان لا اترك اي كتاب الا و انا مستفيد منه بمعلومه مهما كانت صغيره .

ربما وجدت قراءة السيره الذاتيه للبعض فيها متعه خاص لربما يكون التجول هنا مفقود بعض اركانه و هو ان الكاتب لا يقول عن حياته الا ما يريده ربما يجد في ذلك إلهام من نوع خاص او ستر لأخطاء له في الماضي . و النخوره في قصص الخيال العلمي انت الان تتجول في خيال عقل الكاتب وصلت لدرجه كبيره من التجول و علي هذا المنوال كل موضوع بدرجه مختلفه من التجول .. و لهذا ادعوكم جميعا الي النخوره في عقول من تحبوهم او من تريدوا ان تسلكوا مسارهم او تحترموا ارائهم فلا تشاهدهم يتحدثون و لكن اقرأ لهم لأن اثناء الكتابه يكون علي درجه عاليه جدا من الاسترخاء و الابداع :) .

إرهاصات امتحانيه

كلميني يا جميله عن احلام الطفوله
ارجعيلي بالزمان لمرحلة بعد الكافوله
و انا لسه بقول يا هادي
و انا داخل سنه أوله

من يوميها و في الحضانه
امي قالتلي عندك امانه
و من ساعتها لسه فاكر
انها كانت كلمة ذاكر
و لحد ما شعر شاب
و انا كاره الكتاب

مش موقف منه ده انا حتي صبور
بس ماحبش اكون مجبور