تعلم الالش :D

ده زي درس في الالش كده و معلومات عنه و لو مابتحبش الالش اقراه عشان محدش يألش علييك


* مبدأيا كده فيه basics لازم تعرفها قبل ما تبدأ تفكر ترخم او تألش


- الالش بيحتاج لسرعة بديهه عشان تعرف تجيب الالشه 

- الالشه بتحكم يعني فيه اوقات بتطلب ألشه دي قولها علي طول .. اوعاك تكون رخم بس ممكن تسترخم … بمعنى قبل ما تقول الالشه تبقي عارف انها هتعجب الناس او تبقى عارف انها هتحسسهم برخامه و كل واحده ليها وقتها :D

- اياك و الالش المحفوظ ماتسمعش ألشه و تروح تكررها » try to be creative .. دايما هتلاقي ألش جديد بيقابلك


ممكن نبدأ النهارده ب ” فن الرد “ 

فن الرد بيعتمد ع الرد الصادم انك بتتسأل سؤال مجرد سؤال روتيني و الاجابه تبقى معروفه ملل في الشعب فانت تغيره :D


عندك مثلا … عامل ايه ؟
- احسن منك


- واحد يسخف عليك يقولك … ايوه يعني عايز ايه ؟
- عاوز صوبيا برتقان


التجمع فين ؟
لو التجمع الخامس فهو في القاهره الجديده


الحاج بيزغقلك و يقولك … و انت مابتحاسبش نفسك خالص ؟
- اصل معاييش كالكلاتور


الدكتور في الكليه يقولك … فانت تسكت و ماسمعش صوتك
- ترد .. فانتا تفاح


جايز جدا تكون شايف الحاجات دي كلها قبل كده .. و ده المطلوي اثباته .. انك ماتحفظش الاجابه .. انك تكرييت اجابه على نفس النمط :)


الالش فيه نوعين

ألش الكلمه
و ده الاكثر انتشار

مثال .. وريد … وريد توفيق

علو صوت السقف .. السقف بيقع

شرطه مايله ..الشرطه و الجيش ايد واحده

ألش الموقف
و ده اكثر احترافا

مثال .. كتاب الفيل الازرق ده تقيل اوي

(واضح ان الالشه بتقول الكتاب تقيل عشان وزن الفيل مش ألشه علي حروف كلمه )

حد كاتب lost

تدخل تحطله google maps :)


ده اول توبيك عن الالش
to be continued …

قراطيس فكريه (5)

- الانسان لو اده الزعل اللي بيجيله حقه بذمه .. مش هيلاقي وقت باقي في حياته ‫#‏مش_فلسفه‬

- الواحد بعد 3 سنين من الثوره اكتشف اننا وصلنا لدرجه فعلا حرام تضيع مجهود في طلب عام في البلد دي ماتستحقش حتى رباط جزمتك يتفك عشانها حاليا .. و ده مش كرها في البلد

- مش فاهم يعني ايه ووركينج ات ” لسه شويه ” بحاول الاقيلها تفسير مش لاقي و الغريب في الامر ان الموضوع منتشر بنسبه كبيره

- اللي عاوز يحرق الدهون من المفضل انه يشرب حاجه سخنه ‪#‎alsh‬
- اهم حاجه السقوط بعد الوقوع

- الافلام ال based on true story من الحاجات اللي بيبقى ليها طعم و لو الفيلم كويس فدي بتضاعف حلاوته لما تعرف انه قصه حقيقيه .. و بتفيد لما تسمع تجارب غيرك عشان كده اغلب الافلام المرشحه لأوسكارز السنه دي كده

- اغنية mad world من الاغاني الحلوه في الحياه

- مقيش حاجه في الدنيا اللي و فيها جانب ايجابي حتي لو حاجه سيئه جدا فيها جانب ايجابي انك اتعلمت منها ‫#‏مش_تنميه_بشريه‬

- مش عارف حاسس ان احساس التمرد المؤقت ع الموبايل ده هيبقي من التحديات الصعبه في الحياه مع انه هيبقى مريح ليك جدا فاللي يعرف يقعد اسبوع من غير موبايل مايترددش يجربها

- الشعب المصري شعب مجروح بطبعه .. حساس بطبيعته .. ملئ مؤخرا بالفقرات المسليه بجد - راجع معجب احمد شيبه و حمبوله و اثناء المواصلات - :))

- ديل كارينجي من احد كبار التنميه البشريه في العالم مات منتحر و ده من الحاجات اللي بتأيد انها سبوبه و مش هتتغير الا من جواك

- اختراع الريموت اللي بيطفي النور ده شئ ممتاز بيساعد ع الانتخه .. بس الاوحش منه ان الريموت بيضيع كالعاده و الواحد بيقوم يدور عليه فيطفي الكهربا

- الكائن الوغد هو اللي يشتمك في كومنت .. اما الكائن المستفذ هو اللي يعمل على شتيمتك لايك

- مش عارف ليه في المسلسلات المصريه بعد كل حادث لازم المستشفي يبقي مافيهاش دم المصاب و لازم يبقي اللي خبطه نفس الفصيله

نصايح قبل النوم

١- ” عود نفسك تستمع بالسئ .. ابتسم فالقادم اسوأ “

٢- ” nothing is accomplished without sacrifice 

يعني مفيش حاجه بتكمل من غير تضحيه ”

٣- ” لو كل واحد ركز في حاله اكتر ماهو مركز الغير .. الحياه هتبقى احلى “

٤- ” خد الإعلام عندنا كفقره كوميديه .. مش هتتعصب ده بالاضافه انك هتلاقي اللي يضحكك :)

٥- الحاجات اللي بتفكرك بالطفوله ارجع جربها لانها هتحسسك بسعاده حقيقيه

٦- ” كتب التنميه البشريه بقت سبوبه .. مالكش دعوه بيها … كتب احلام مستغانمي حريمي “

٧- ” خليك مقتنع ان كل انسان شايف نفسه بيفهم دي طبيعه بشريه مش مشكله .. المشكله تكمن بقي في اللي فاكر انه - الوحيد - اللي فاهم ده تتجنب نقاشه “

٨- جرب لخبط في الاكل الحلويات .. حط من ده علي ده .. هيطلعلك حاجه في الاخر تحسسك بسعاده :)

٩- ” ماتحاولش تشتغل ناقد طول ما انت قاعد تنقد في حاجات .. ده ببساطه لانك مش محتاج تحاول انت اصلاً ناقد :) “

10- المفروض لو حد بعد عنك تشكره .. لانه ده افضل كتير من انه يبقى جنبك و ينافقك

11- الدنيا لو جارحه .. لونها لون قرمزي

12- ماتحولش تحارب الحظ ولا تعاند معاه ولا تديله اكبر من حقه - عمليه مركبه -

13- ماتكسلش انك تقوم تجيب ريموت التلفزيون .. لان ده هيحبرك تشوف حاجات عجيبه

١4- ” اوعي تاخد نصيحه من حد قبل ما ينام لأنه عادة بيبقى وصل لدرجه من الهذيان “