قراطيس فكريه (4)

- المعادله بسيطه يا صديق .. الحاجه اللي ماتحبش حد يعملها فيك ماتعملهاش في حد 

- و احنا صغيرين كنا بنحب مسلسل " سوق العصر " جدا .. احنا مش طالعين جيل fake من فراغ 

- محظوظ هو من يحب زوجته بعد الزواج و لكن الاكثر حظا هو من يتزوج حبه الاول بالحياه 

- انتم عارفين ايس كريم بالشيكولاته لما تسيبه و يسيح و يبقي هصير شيكولاته ... بيبقي من الحاجات اللذيذه في الحياه 

- لو دورت حواليك كتير مش هتلاقي حد دايما جنبك ولا مستحملك اد موبايلك 

-كان عندنا في مصر مولد الحسين و مولد السيد البدوي .. دلوقتي بقي عندنا مولد 6 أكتوبر ! 

- " أنا خريج و خلصت تعليم " الجمله اللي الواحد بيفضل طول عمره نفسه يوصلها و اول ما يوصلها يرجع يقول " ياريتني فضلت طالب "

- المواطن المصري يفضل طول عمره يكره صورة البطاقه لحد مايشوف صورة الفيش و التشبيه

-المبالغه في الحكمه يخلق حاله شديده من الغباء .. ع العموم المبالغه في أي شئ بتعمل حاله من الغباء 

- كل المغنيين في اغلب الفولكور العربي بيغنوا ل ليلي ( الشاب خالد- منير- وديع الصافي -كاظم ) و علي ( وسط البلد - منير - كارول سماحه - عماد بعرور ) اكيد في قصة حب تراثيه تجمع علي ب ليلى

-اشرب سخن تروق ... اشرب ساقع و انت رايق 

مشاعر مقتبسه

 في حاجات كتير ع الفيس بتبقي مقتبسه و فيه كائنات تحسها فعلا كائنات كوبيد من كتر ما بتقتبس ، بس الغريب ان المشاعر نفسها تبقي مقتبسه و مكرره اما هتعبر امتي ياخي :) 

بما ان ال ladies first فنبدأ بالبنات .. و هنا المشاعر مرتبطه بالحنيه و كده

- تتخاانق مع الواد اللي عليه العين ... تقوم رايحه كاتبه " انا امرأه لا انحني الا في صلاتي "
يقوم الواد قادر داخل رادد : انا راجل لا انحني الا لرباط الجزمه

- تيجي بقي مرتبطين مع بعض و الظروف تيجي ضدهم و يسيبوا بعض ... تلاقي روح السيده انغام جضرت و تكتب " اتمناله الخير ماهو ياما اتحمل علشاني "
ده بغض النظر ان كانت فعلا تتمناله الخير و لا تتمناه يولع بجاز

اما الجانب الاكتر اقتباساً الايام دي فبتكون من كتب " احلام مستغانمي " سواء عارفين انها في الكتاب ولا لا ...هي فعلا كاتبه حريمي كده

اما عن الرجاله فمتركزها اكتر علي الجانب الرجالي

- يتخانق مع ناس بقي و قفش .. هنا ييجي دور البوست اللي شوفته مش اقل من ٥٠ مره ع الفيس " لا تأسفن علي غدر الزمان .. لطالما رقصت علي جثث الاسود كلاب
لا تحسبنا برقصها تعلوا علي اسيادها .. تبقي الاسود اسود و الكلاب كلاب "

اما بقي عمنا اللي حاسس بوحده وسط زمايله و انا مصدر بهجه و محدش حاسس بيه فده بينزل ببوست " مات ابن المهرج فطلع علي المسرح و الناس ضحكت بلا بلا بلا في الاخر ان اللي بيسعد الناس محدش بيحس بألمه "

اما بقي لو الكابتن رايح يتقدم " ادعولي بكره اهم يوم في حياتي .. دعواتكم " و في نفس ذات الوقت هي تبقي كاتبه " يارب "

اما شعورنا تجاه الكليه اللي لازم يبقي ليها مكان في بوست فهو يرتبط بكلمة جاز و تجده دائما " انا جيبت جاز " " الهي الكليه تولع بجاز " و هذا لا يندرج تحت بند مشاعر مقتبسه بس هو كل بيحس نفس الاحساس :D

و هكذا الكثير من البوستات المقتبسه الشهيره اللي كله شافها قبل كده كذا مره .. هما كتير بس عشان ماطولش :)

مشاعر ملغبطه

عن مشاعر ملغبطه بنشوفها كتير :)

‫‏‬عن حب عيشت سنين تستناه و ييجي في لحظه من غير ترتيب

عن حب ضاع من كتير بسبب العناد علي حاجات صغيره
.
عن شخص فقد حبيبه و يفضل كل سنه يحتفل بعيد ميلاده و يجيبله هديه بأسمه في البيت

عن حب ضاع بسبب الاهل و المناظر الخداعه اللي بتقفد الشعور بالحب

عن حب استني بعد سن الستين زي مايكونوا لسه مخطوبين

عن صدف كتير في بعض مع الحبيب و اللحظه الغريبه اللي اتقابلوا فيها

عن حب بجد بعيد عن الصحوبيه و الهوا عن حب فخطوبه فجواز فعيال

عن حب ضاغ بسبب اتنين فضلوا ساكتين مع انهم مـتأكدين من مشاعر بينهم

عن حب بيدي الواحد سوبر باور بيخليه يعمل حاجات ايجابيه عمره ماتوقع انه يعملها

عن حب يبعد عن البرود و الروتين

عن الجنون في الحب اللي بيديله طعم مختلف

عن حب بيسهر العيون من الفرحه من البكي من التفكير

عن حب مايقلش عن قصص الافلام واللي بنسمعه من زمان

عن جرح يغير حياة الواحد ممكن يقويه و ممكن يعقده

عن حب من طرف واحد قاتل كتير و عن جرح عامله في حد و معمول فيك

عن وهم فاكره كتير حب و هو اصلا هوا

عن سينجل علطول يسمع عن الحب و مش حاسه

عن دمعة فرح مع سماع كلمة ( بحبك - تتجوزيني - بقالي ابن منك يشيل اسمي )

مربعات تخاريفيه

مربعات مع نفسي مالهاش أي قانون :)


 بطلت اقول خلاص اشمعنا
عشان معادش ليها معني
ماهو انا وراك ياعم الحظ
... لحد ما الدنيا تجمعنا

وحشتني مسكة القلم و التخاريف
و اللي يقوللي يا ظريف
و اللي يسأل با خفيف
و اللي يقولي مش معادك ..
فوت علينا في الخريف
 
يغيب عن العين
ييجي يزورك في المنام
تصحي فاكر كل ال scene
بس ناسي الكلام
 
اصله حزن ممزوج بفرح
ضحكه مخلوطه بفرح
الايه معكوسه ولا معدوله
الحاله اوفر ولا معقوله
 
بدخل اكتب بس بنسى
هو انا كنت داخل اقسى
ولا اضحك ولا اتوه
ولا بحار ناقصه مرسى
 
محفظتي ضاعت و لقيتها
لحظات حسستني بقيمتها
و لو اي حاجه غاليه عليا ضاعت
بزعل انا في ساعتها
 
وجودك عاملي مشكله
ب زنك لنومي مكعبله
مضطر اني اقتلك
اصلك نموسه مستهبله

 عادي يبقي في القلب مزروع
بس في حياتك ملوش وجود
تصنيفه تبع اي نوع
بس الاكيد عدا الحدود

و ازعل ليه ما دمت بخير
الهم لازمله التغيير
مش اول مشكل هقابله
ولا في يوم هيبقي الاخير

اللحظات في انتظار اللحظه

العمر مجرد مجرد مجموعه من اللحظات ، هناك  لحظات ثمينه تشعرنا بالبهجه في أقصي صورها و نظل نخطط لها و ننتظرها أيام و ربما شهور و هناك ايضاً ، و هناك ايضا لحظات نخشي منها و تشعرنا بالقلق لعدة أيام خوفا من حدوثها .
و ليكن مثال " ياااه انا عندي ايفينت كبير اخر الشهر ياااه ده انا مستنيه من زمن بنام و اصحي افكر فيه يا تري ايه اللي هيحصل فيه ده هيبقي يوم عالمي مايجيش الايام ده تعدي بسرعه كده بقي  "، علي النقيض " ربنا يستر انا خايف بغباء من اليوم ده مرعوب من اللي هيحصل فيه ده ممكن يبقي يوم غم نفسي الايام ده تعدي بسرعه وقوع البلا ولا انتظاره "

بالنظر الي ما سبق ستجد انك اهدرت في عمرك الكثير من اللحظات من أجل لحظه واحده ربما تكون هذه اللحظه بالفعل لحظه ثمينه و ستشعرك بسعاه لن تنساها و لكن مهما يكن فهي لا تستحق أن تضع من عمرك لحظات كثيره ربما هذه اللحظات كانت ستحمل حدث هي ايضاً.

و عادة ما تجد نفسك تخرج من حدث فيرتاح قلبك و لكن تدخل في انتظار حدث اخر و هكذا ... ربما تنتظر شهر من أجل يوم و بعد ذلك تدخل في انتظار ليوم اخر و بحسبة بسيطه ستجد نفسك و ليكن انتظرت عام كامل من أجل معيشة 12 يوم ! فكم من لحظات ق اضعتها من عمرك من أجل لحظة فرح او حزن ، ربما اُصبت بإبتلاء و ق حزنت و لكن لا تجعل هذا الحزن يطول لكي لا تسرق ايضا من نفسك لحظات تستحق الحياه .. ففي الفرح او الحزن لا تجعل الانتظار من أجل لحظه يسرق منك لحظات !

بطاقتي الشخصيه

الوصف : مجرد إنسان

المهنه : بيطري بعالج الحيوان

الحلم : أشوف مصر في امان
الحياه : الهموم للنسيان

أسلوبها : ساعا بتقلب جنان

الملل : مالوش عندي مكان

اصحابي : معايا وقفة جدعان

سياسيا : من حال البلد قرفان

النادي : في حب الزمالك غرقان

المنتخب : بشجع ايطاليا من زمان

الفشل : بالنسبالي كائن جبان

الاكل : الايس كريم ده ادمان

الكتب : بمعلوماتها انا غرمان

السينما : بتعملي حاله من الروقان

إلكترونياً :في منتجات ابل هيمان

العقده : من المنبه انا زهقان

الامنيه : جنة الرحمن

عمر طاهر

دائما ما تجد هدفنا في " بوك خانة " هو الارتقاء بالمستوي الثقافي للمجتمع و زيادة عدد القراء في مجتمعنا و عادة ما نُسأل " انا ماليش تقل ع القرايه اعمل ايه ؟ " في هذه الحاله تكون الاجابه ان تبدأ بقراءة المجالات اللي تحبها و ان تبدأ بقراءة الكتب الساخره التي ستجعلك تضحك ولا تمل سريعا و انت في بداية تعرفك علي القراءه ، و حينما نتحدث عن الكتب الساخره فإذا دخلت اي مكتبه او متجر للكتب ستجد اسما دائما ما يتصدر البيع في هذا المجال ... إنه عمر طاهر .

و لد عمر طاهر بمحافظة سوهاج عام 1975 و بدأ عمر طاهر بإصدار ( مشوار لحد الحيطه - شعر) عام 98 و من هنا كانت انطلاقته فمن مشوار لحد الحيطه مرورا ب قهوه و شيكولاته وصولا الي ( الكلاب لا تأكل الشيكولاته ) فانه تاريخ ممذوج حقا بالشيكولاته بين العديد من الكتب و المقالات فأستطاع بخبره جعل الكثير من الاهلاويه أن يقرأو كتاب يسمى ( زملكاوي ) و دائما ما تتخذ شخصية ( برما ) رمز للمصريين و فلسفته و فكره يلخص كثير مما يحدث بجمله صغيره ، و تجد نفسك دائما ما تردد اشعاره و دائما ما تقول " تخيل نفسك " ليس هذا فقط فهناك العديد من المقالات تجدها دائما في ذهنك مثل مقال ( 100 طريقه للقضاء علي الاكتئاب ) فهو اول من اشار مثلا الي فيديوهات القذافي علي اليوتيوب قبل ان تنتشر بعديها بشهور بين الناس .

اما عن موقولاته فحدث ولا حرج فدائما ما تجد نفسك تستخدمها في كثير من المواقف حينما تجلس مع اصدقاءك علي القهوه و تطلقون النكات و تجد احدهم لم يستوعبها فتقول له " من يضحك اخيرا هو اغبي واحد في القعده " و حينما يشتد بينكم الحوار بين الاهلي و الزمالك فتجد نفسك تنهي الحوار بقول " ان تكون اهلاوي فهذا قدرا ان تكون زملكاوي فهذا اختيار " و حينما تجلس تتسامر مع طفل صغير تجد نفسك تنصحه " مش مهم انك تغير الكون المهم ان الكون مايغيركش " حتي و انت جالس مع نفسك تجد نفسك في لحظات صفاء ذهني تقول لنفسك " عندي صحيح حاجات كتير لكن ناقصني حاجات اكتر .. ناقصني اني اقدر اطير و عارف اني في يوم هقدر "
و لم يتوقف ابداع عمر طاهر عند حد الكتابه و الشعر فقط بل اتجه ايضا الي العديد من المجالات , فقد اتجه الي الترجمه فقد ترجم رواية ( بالقرب من نهر بيدرا جلست و بكيت ) و كما قال فهو ليس من عشاق الترجمه و لكن قام بترجمتها بعدما قابل باولو كويلو بمدينة ريو دي جانيرو و حينها قال باول له " انها اغلي بناتي " ، و اتجه عمر طاهر ايضا لكتابة سيناريو و تأليف الافلام فقد شارك في فيلم ( عمليات خاصه ) و قام بكتابة سيناريو فيلم (طير انت ) .
اما عن مسلسلات الكرتون فقد كتب حلقات ( سوبر هنيدي ) و قام بتقديم برنامج ( مصري اصلي ) و اتجه ايضا الي كتابة الاغاني فليس جديد عليه كونه يجيد الشعر و من اشهر اغانيه ( خليها علي الله ل أصاله - كلمه و حبيبي الاولاني ل رامي صبري ) و في بداية الالفينات عمل كمراسل اذاعي ايضا في قناة النيل اللبنانيه .

اما عن شخصية أبو رقيه فتجده دائما يحب ان ينشر السعاده و يشارك بها كل من هم حوله و مثلما قال في برنامج اتجنن الذي يقوم بتسجيل حلقاته الان و يذاع علي الانترنت " اي حاجه اضربها في رقم هتزيد ماعدا السعاده بتزيد بالقسمه " فتجده دائما متابع مع كل من يتابعه علي مواقع التواصل الاجتماعي فدائما ما نجده يدلو بدلوه اثناء ماتشات فريقه المفضل ( الزمالك ) و دائما ما يحاور اصدقاءه في مقالاته السياسيه ، فعمر طاهر ايضاً من رواد علم الألش و ذلك قبل انتشاره بشده في الاونه الاخيره و من منا ينسى ماجد الكدواني في فيلم طير انت حينما سُأل عن اسمه و قال " مارد .. مارد الكدواني " . ليس هذا فقط فعمر طاهر ايضا حينما رأيته بالصدفه و جلست معه فهو يشعرك بأنه صديقك و يعرفك منذ فتره و ليس كاتب مشهور و كل دقيقه شخص يأتي " عمر ممكن صوره ؟ " فتجده يتقبل الامر بشكل جميل ولا يمل من ذلك , و هو ايضا من يتميز بخفة ظل في كثير من المواقف مثلا تجد علي باب منزله ( عمر طاهر - رائد فضاء )

حقا كلما قرأت كتب ل عمر طاهر تجد له بصمه و اضافه علي فكرك فتجد نفسك كثيرا ما تتأثر به و تجد نفسك دائم الانتظار الي جديد مقالاته تجد نفسك من فتره لأخري تشتاق لشخصية برما فتقوم بقراءة مقال قديم له في انتظار الجديد ... حقا ان كنت تريد ان تسمتع بالادب الساخر فأنصحك بعمر طاهر .

بوستات امتحانيه .. مش للقرايه ... متجدد

التدوينه دي مش للقرايه ... هي تجميعه بس لبوستات ايام الامتحان
ماتقرهاش لان مش هتستفاد منها حاجه و عشان كمان مش هتفهم تلت تربعهم بيتكلموا علي ايه فمتضيعش وقتك :D

-

بيان رقم (١) ل أولتراس فيوتشر فيتس

إلي ادارة الكليه 
بعد صمت دام ٥ اعوام علي الظلم و النفخ في الامتحانات
و ها انتم بعد كل هذه السنين مازلتم تتبعوا نفس الاسلوب
فنطلب منكم التخرج و في حال العبث معنا فقد اعلنتم الحرب علي انفسكم
فلم تعد تتسع الكليه لاحد غيرنا اما نحن او نحن لذلك فلتتخلصوا منا و تعطونا شهادة التخرح

لسنا جروب شكاء بكاء و لكن فاض بنا الكيل و لا مجال للعوده الي الوراء لأخذ حقنا بعد ضياع اعوام من عمرنا ( عقلنا ضرب فيها )
اما النجاح ... او الفوضي 

- الواحد لما يذاكر من ورق الاوائل و يلاقي ال spelling عندهم مضروب بالنار
اي فيل لايك

ربنا مابيديش للواحد كل حاجه ادانا احنا ال spelling و اداهم هما الكلام اللي يتكتب :D

العامل المشترك

- العامل المشترك بين اي شلة ولاد صحاب .. ان لازم واحد فيهم حاطت كول تون لماهر زين
- العامل المشترك بين اي شلة بنات اصحاب ان لازم حد فيهم حاطت صورته ع الفيس تركي او من فيلم awalk to remember
- العامل المشترك بين دكاترة اي كليه ع الفيس ان لازم نصهم يبقي بيتكلم لغه عربيه فسحه - ده علي اساس انه الشهر العقاري
- العامل المشترك بين الساسيين في بلدي رغم اختلافهم هو انهم عندهم ما يسمي ب "جنون العظمه "
- العامل المشترك بين الميدتيرماتفي الكليه انها وسيله كويسه لتضييع درجات بدري
- العامل المشترك بين الدحاحين و الفشله في الكليه هو درجاتهم في النشاط واحده
- العامل المشترك بين اي حد بيكتب بالكيبورد ع الكومبيوتر ان كلهم خطهم حلو
-العامل المشترك بين المخطوبين هو ان موبايلهم دايما " battery low "
- العامل المشترك بين الكفراويه في الكليه في كل الدفع انهم دايما بييجوا متأخر
-العامل المشترك بين مواقع التواصل الاجتماعي انها اصبحت الظاهره الكبري لتضيع الوقت

لماذا الغريب

جرت العاده دائما نجد انفسنا نقول انا الان بحاجه الي صديقي الصدوق لكي احكي معه مشاكلي او بحاجه الي اسرتي لكي افضفض بما في داخلي او التحدث الي حبيبتي لكي استشيرها في امور كثيره فبديهيا نجد نفسنا نبحث عن اقرب الناس إلينا للتحدث معهم و لكن هل وجدت قبل ذلك في رغبه ملحه للتحدث مع الغريب ؟ و لكن لماذا الغريب ما الذي يجعلنا في التفكير في ذلك ؟؟

ربما يكون السبب هو رغبتك في التحدث الي شخص ليس لديه اي خلفيه عن هذا الموضوع من قبل لكي تأخذ رأيه عن ما حدث في تلك اللحظه ولا يختلط رأيه بما حدث في الماضي .
 ربما  تريد ان تتحدث معه من الاساس عن من هم قريبين منك و من هم من المفترض التحدث معهم و لكن لا يمكنك ان تتحدث معهم عن انفسهم .
ربما يكون بسبب رغبتك في تأليف بعض القصص و وضع اجزاء خياليه في القصه قد يكتشفها المقربين منك او بمعني اخر ( تحط التاتش بتاعتك )
 ربما يكون لاعتقادك انك عندما تتحدث مع الغريب ثم يغادر فانت اخذت برأيه اما هو فقد غادر و لن يعود و اخذ معه الكلام بلا اي ضرر .
من الوارد يكون السبب الرئيسي هو رغبتك في التحدث في الموضوع مع شخص يري الموضوع كاملا من الخارج و رغبتك في استماع الي اراء جديده مختلفه عن تلك الاراء الموجوده دائما من حولك 

تعددت الاسباب في هذا الموضوع الغريب و لكن الغريب هو انني اشعر برغبه في التحدث الي شخص غريب عني 

قراطيس فكريه (3)

الجزء التالت :)

-  هو ليه دايما كل امتحان شفوي اللي قبلي يتسأل السؤال اللي انا عارفه و انا ماتسألوش ؟ مش غريبه دي 
- اي حاجه بتضايق بيها والدك و انت صغير لو ليك اخ صغير هضايقك بيها لما تكبر زي مثلا مسكك للريموت و انت بتاكل و تزيته :)
- ظاهرة ال Crushes اللي انتشرت ماهي الا ظاهرة اشتغال اصحاب لبعضهم ... و احيانا اشتغال للنفس 
- مين فينا و هو صغير مكانش بيحب مشهد الطار في كليب محمد فؤاد - انا لو حبيبك ؟
- الواحد من كتر عدم النوم بقي عنده اقتناع بمقولة " انا و النوم don't mix"
-ساعات كتير بشتاق الي نداء امي كل يوم الصبح " قولتلك مية مره تحضر الجدول قبل ماتنام عشان لما تأخره الصبح بتتأخر " مع انها لحد دلوقتي ماتعرفش اني عمري ما حضرت الجدول
- السياسه عندنا في البلد كترت و كل مختلف عن التاني ، بس يبقي الشئ الوحيد المشترك فيهم " جنون العظمه "
- مش عارف من اللي فهم الناس الكبيره ع الفيس و دكاترة الجامعه ان الكلام ع الفيس لازم يبقي لغه عربيه فصحه ؟ 
-علمتني الحياه ماسلفش كتبي لحد الا لو معايا كتاب ليه 
-بالنسبه ل أنغام و هي بتقول " هو انت ليه سيبتها .. هو انت ليه سيبتها .. هو انت ليه سيبتها .. هو انت ليه سيبتها .. هو انت ليه سيبتها .. هو انت ليه سيبتها .. هو انت ليه سيبتها " طيب مش تقولي الاول هو انتي ليه علقتي ؟؟

ورق

ورق ورق ورق
عمال اصور في ورق
المعلومات بتتحرق
و المجهود بيتسرق

دبوس علي دبوس علي دبوس
كل ملزمه اخرها دبوس
الورق يخلص ع الفلوس
في المذاكره مش عارفين ندوس

كوم علي كوم علي كوم
الورق بقي بالكوم
بقي زياده عن اللزوم
و الحل بقي في النوم

امتحان ورا امتحان ورا امتخان
كل يوم بقي امتحان
كل مره لازم نتهان
مش حاسين ان انا انسان

ماده علي ماده علي ماده
مش عارف اعد كام ماده
الكليه بقت علطول شاده
و للنفس دايما سده

حكاية ميدتيرم

 انا هحكيلكم عشان تعرفوا

و هسيبكم انتم تتصرفوا
الصوات عالي و كان تنبيه 
غايب ملاكش امتحان يا بيه
نده اسامي الشباب
و نسي يطلعني من الغياب
لقيت نفسي مش مذاكرقولت انا غيبت مانتش فاكر
قالي ملاكش امتحان
نزلت اجيبله استئذان
اذن المطار و صورة الباسبور
و ع الروتين انا كنت صبور
و جيبت موافقه من الاداره
قالي ماليش فيه يا خساره
شد معايا شديت معاه
و دي بداية المآساه
قاللي خلاص نمشيها رسمي
طلع ورقه و اخد اسمي
رجعت للاداره ب دي البليه
قاللي هندخلها مجلس كليه
قولت المشكله هتكبر
و هتيجي عليا انا و اتكدر
قولت بلاها الامتحان
بس اكون ساعتها فأمان
و اعتذرله و انا مش غلطان
رجعت اعتذر في ليلتي السوده
قالي ماتدخلش حتي الاوضه
اهم حاجه يكون متكيف
و انا في الماده شكلي هصيف

قراطيس فكريه (2)

الجزء التاني من قراطيس فكريه .. خدلك قرطاس :)

- الاعتراف بالغلط اولي خطوات حله .. في حاجات ممكن تساعدك بس لو بتثبتلك فشلك طبيعتك بترفضها ، نفس نظام المريض النفسي الدوا هو علاجه بس بيرفض ياخده لأنه بيثبتله انه مريض نفسي.
- المنبه حاجه غبيه جدا بس اذا اتقارن بلعبة المزرعه السعيده فهو لحن .. المزرعه السعيده خنيقه جدا بس اذا اتقارنت بالمسلسلات التركي فهي مسليه ... المسلسلات التركي ممله جدا بس اذا اتقارنت بأي حاجه هتفضل ممله جدا برده .
- الواحد بيتضايق من الحاجه اللي بتضيه لو اخد باله منها .. غير كده بيبقي عادي زي الوقت اكتر حاجه بتضيع مننا بس اكمنه بيضيع علي خوانه بناخد بالنا كل فتره ان فيه فتره ضاعت.
- الطفل الصغير بيحقد ع الطفل الصغير صاحبه لأنه عنده اصحاب كبار .. بس هو مش واخد باله انه عنده اخت بنت كبيره .
- تعبت من التدوير علي الدفعه اللي مش نحس من كتر ما كل الشعب بيقول علي نفسه احنا دفعه نحس .
- البنات بتروح الفرح عشان تحقد ع العروسه - مشهد محفوظ في التلفزيون المصري - بس دلوقتي بقي المنظر عباره عن البنات بتروح تتجوز من الفرح .
- شعورك بالفرحه و انت بتاكل ايس كريم لا يقل عن شعورك بالفرحه بالحصص الاحتياطي ايام المدرسه .
- من اكتر الاحاسيس امتاعا في الحياه كباية ميا تلج في عز الحر بتحس ساعتها انك بدأت تحس .
- الامهات زمان كانوا بيقابلوا ولادهم بحمدالله ع السلامه ، دلوقتي بيقابلوهوم بزعيق  ماتمشييييييش بالجزمه جوا الشقه .
- الصدفه بتخلي الحدث احلي ، المفاجأه بتخلي الهديه اغلي ... بس ده مايمنعش انهم في العكس برده يدوا نتايج سلبيه اكتر فهما عاملين صيغة المبالغه كده .

كاس الحلم

قعدت اقلب قي ذكريات الماضي
كاس الحلم ايامها فاضي
 بس ساعتها انا كنت صغير
فكنت علطول قاعد راضي

و بأول حلم بدأ يتكون
معاه القلق بدأ يتلون

و خلاص بدأت اتكلم
و للحركات انا بتعلم
و ع اللي رايح و اللي جاي
واقف انا عمال بسلم

رجلي بتتحرك بدأت تدب
و اطول الحاجه بدأت أشب
و زي ما بنشوف في الافلام
لبنت الجيران بدأت احب

كنا نلعب كوره في شارعنا
و نزعق نشوف مين سامعنا
و بعديها نتجمع سوا
نروح نصلي ورا شيخ جامعنا

و كنا دايما بعد اللعب
نحكي لبعض حواديت رعب
عفاريت و كمان شويه جن
حكايات تخلي النوم صعب

و ابتدت احلامنا تكبر
من يوم ما دخلنا المدرسه
شويه كانوا عايزين طب
و اصحابهم عايزين هندسه

و الاحلام بدأت تزيد
و النهايات مالهاش تحديد
بس الثابت في اغلبهم
ان  التنفيذ مفيهوش جديد

زاد العمر معاه الاحلام
حكايتنا زي الافلام
كتير منها في العقل
و قليل يطلع بكلام

 يزيد العمر تقل الضحكه
و كل يوم تتغير سكه
مش لازم افوت انا وقت
قبل ما ألاقيني قاعد ع الدكه

فجأه لقيت نفسي اتعكرت
ايه اللي خلاني كده اتتغيرت
ياريتني ما قلبت في ورق الماضي
ولا في الحلم ولا فكرت

قراطيس فكريه (1)

دي مجموعه من قراطيس فكريه ... زي ما فيه قراطيس لب و سوداني ... خدلك قرطاس فكري:D كل جزء 10 حبات :)

- مش شرط اللي بيتشتم من الناس كتير يبقي غلطان ... فحكم البلاي ستيشن اكتر واحد بيتشتم في العالم عمره ما بيغلط
- و انت علي سفر بيبقي اقصي طموحك يتمثل في الوصول في يافطة مرحبا بك في محافظتك .. بيبقي هاين عليك تبوس الارض
- من و انا في حضانه لحد مانا وصلت في 5 كليه و لسه نفس الممثلين في التلفزيون المصري بيعملوا دور الطالب الجامعي ... ماعندهمش تقاوي حتي !
- ماتعودش نفسك تعلق فشلك علي غيرك هتتعب اوي و هتبرر اي حاجه .. بس في نفس الوقت ماتسمحش لحد انه يعلق فشله عليك 
- احنا في مصر شعب النقاد .. 25 % ناقد فني و 25 % ناقد رياضي و 25 % ناقد سياسي و 25 % ناقد لأي حاجه :D
- من تراث اغانينا (اني اتنفس تحت الماء اني انخع انخع انخع - يا حافية القدمين الارض عليها ازاز )
-و انت بتشتري مع اصحابك هدبا ساعة السفر .. هتكتشف ميزة انك مالكش اخوات بنات هما يشتروا مية حاجه اكسسوارات علي شنط علي عقود انما انت اخرك لأخواتك طقية بكار :D
- اغلب اللي شافوا فيلم Argo  اللي اخد اوسكار 2013 احسن فيلم قالوا ان نهايته شكل الطريق الي ايلات بالظبط مع العلم كمان ان مفيهوش مشهد يضاهي مشهد المتفجرات بتاع استاذ نبيل الحلفاوي :D
- من الاحاسيس الغريبه في الحياه لما تبقي في المطار و تلاقي الطيار يقولك في مطبات هوائيه و ممكن الرحله ماتطلعش فتلاقي واحد قاعد في قاعة الانتظار بيتفرج علي فيلم قصته طياره بتقع .. ايوه يعني بيتعلم الطيران مش فاهم :D
-تعاقب الدراسه بعد الاجازه ده في حد ذاته بيعمل أزمة ثقه :)

و انت طالع عمره

دي معلومات كده ممكن تحتاجوها لو اول مره رايحين عمره .. انا قولت اقولها لأصحابي و كده و اعرفها ل اللي مايعرفهاش لأني اتسألت فيها كتير :) 10 معلومات بعيده عن المناسك اللي طبعا هتلاقي اللي اجدر مني يشرحهالك اثناء العمره .. ربنا يكتبهالكم جميعا

-من الحاجات الشائعه ان ناس بتبعت مصاحف تتحط في الحرم علشان يقرا منها ناس و يستفادوا .... لا ينصح بهذه الحركه ده لأن المصاحف دي بتتشال بعد يوم او اتنين لأنهم بيخافوا من التحريف و بيسيبوا طبعة هيئة الحرم بس 
- أول ماتنزل تشتري خط زين (الدولي) ده حسابه بالثانيه و الدولي ارخص من المحلي
-لو لا قدر الله تعبت او حد تعب معاك .. اقرب مكان للعلاج في المدينه .. مستوصف الحرم النبوي موجود عند باب البقيع ... في مكه مستشفي أجياد عند مدخل اجياد تحت فندق الساعه و مستشفي للاطفال عند مدخل عزيزيه
- مش كل الاوقات بيبقي فيه مزارات بس لو مفيش لأنها مش من مناسك العمره - و ده بقي نادرا لان اغلب الشركات بتودي- روحها انت ... في المدينه جبل أحد ( و ده موجود بالجنه ) - مسجد قباء ( الركعتين فيه تعادل عمره )-مسجد ذات القبلتين ده ملوش فضل بس غير انه تم تغير فيه القبله من المسجد الاقصي للمسجد الحرام
-بعض الكلمات الفراسيه تكون عارفها هتقابلها كتير - اغلب الوقت جنبها ترجمتها بالعربي - بس ساعات بتبقي مش موجوده زي مردان ( للرجال ) - زنانه ( للنساء ) - وضوخانه ( مكان الوضوء و دورات المياه ) - دارو خانه ( صيدليه )
- من الافضل انك تشتري حاجتك او هدايا لو هتجيب.. من المدينه الافضل و لو هتشتري كل ما تبعد عن الحرم السعر اقل حتي في الصرافات الريال سعره اقل لو هتغير فلوس .. كل ما تبعد 
- افضل طريقه لتغيير الفلوس هي الفيزا لان السعر بيبقي اعلي في الصرافات 
-اسهل باب للوصول لقبر الرسول هو باب السلام (1) ده بيودي مباشرة لباب الرسوا و باب (3) اقرب باب للوصول للروضه الشريفه 
- اثناء العمره العلماء قالو ان زمزم تتشرب لحد التضلع ( يعني لحد ما بطنك تتملي ميه وتطلع للضلوع ) مش كبايه بس و كده 
10- اغلب الفنادق هتتهد في مكه عشان توسيعات الحرم في خلال 20 سنه ماعدا فندق الساعه و دار التوحيد

اسبوعنا فى بيطرى

دي لما كنت في سنه تانيه كليه  :D عوده لبداية الكتابه محاوله بتوصف الاسبوع ساعتها :D

بداية القصة هى ...................... صاحبى عدى عليا
نازل من بيتى متاخر ................ رايح كالعادة الكلية
ناوى مفوتش سيكشن ............ ... علشان اعدى السنة ديه
بداية الاسبوع بايو ................... يا ساتر من السيرة ديه
استميشن للجلكوز .................... وكدا تجربة علمية
ياريتها كدة وبس ..................... دى قلبت مسائل حسابية
وفجاه بقيت تاية ..................... انا وكل اللى حوالية
فقولت العيب مش فية .................المادة بيعتنا القضية
روحت ضاحك حتة ضحكة .......... بصلى بعين رضية
وفجاة قلى برااااااااااا ................. انت مالكش سكاشن ولا درجات عملية
 
روحت نازل للتشريح ............. ... فورمالين ناقصة شاليموة
دخلت مع كل اصحابى ................السكشن عايزين نصوروه
الفيديو عمال يقطع ................... السيكشن طويل ياهوة
بعد كدة لبص افوجئ ...... .......... موبايلى باترى لوة
قالى الجاموسة حاطة احمر ............قولتلة وكمان لابسة سابوة
قالى انت بتستظرف ..................على براااا وغيابك هنشلوة
طب بالذمة مين اللى استظرف ....... قولولى يا خلق اهوووووووووه 

بعديها دة بقى انتاج .....................شوية انيمال وشوية بولتيرى
قالولنا اية مكان نضيف ............... . قولت هاروح انا دغرى
رايح حاطط فى دماغى ................ هشوف حته من هايبرى
اية ده سيراميك فى كل حتة ............ دة محصلش حمام تحت كوبرى
ولا شوفنا تكيف ولا سجاد ............. غيرش هى كراسى بتروح وتجرى
قاعد مش فاهم حاجة ......... ......... المسائل بقيت عبرى
قاعد فى جمب لوحدى .................. قالتلى انت اسكت يا غجرى
قالتلى اطلع براااااااااا....................ياناس بقى دى اخرة صبرى
اليوم الاول عدى ........................ومراوحى طابقة على صدرى
فقولت انا مش هياس ................... وهصحى بكرة من بدرى 


تانى يوم من 9 الصبح ..................فسيولوجى مادة بحبها
قولت هدخهل السكشن ................. وانا سيبها بظروفها
لسة يدوبك بقعد .........................سمعت صوت عالى
بيقول لو معاكش كتاب ..................يبقى على برا يا غالى
بس انا كان معايا كتاب ................ فاستنيت وقلت عقبالى
بعديها الى كتابة ناقص يحصلة ........ بكل هدوء طلعت اصل دى بقت طبيعة حالى 

البيهافيور ده حالة خاصة ...............قاعدين مع بعض كلنا اصحاب
قاعدين اكثر من سكشن .................والعقدة الطرد يا شباب
دينتيش للشيب والكاتل ..................وكمان للقطط والكلاب
غريبة انا قاعد فاهم ......................ومركز من السلايدزع اللاب
انا مش مصدق نفسى .....................الطرد بقى وهم وسراب
صوت جه من بعيد .......................صاحبة خبى بقة بالكتاب
الدكتور قام لاغى السكشن ................وقطع ورقة الغياب
وانا اعمل اية بقى ....................... حتى الحظ بقا هباب
كان نفسى اتكلم عن الاقتصاد .............بس مبحضروش يا شباب
وادى الاسبوع عدى ................... ..كله عذاب فى عذاب 

وادى اسبوعنا فى بيطرى ................انا عارف بيعدى هوا
ورغم كل اللى بيحصل ...................تلاقينا مش محتاجين دوا
وتلاقينا دايما مبسوطين ...................مادام مع بعض سوا
اصحاب مابنسبش بعض ..................ايد واحدة زى المسطرة
مستيينى اقول حاجات ....................علشان كدة واقفين قدامى
بس انا مش هتجردل .....................وبكدة خلصت كلامى

الناس ترى بأعينهم

بداية اسمع من يقول " يا فقاقتك ياخي الناس بتشوف بعنيهم قول و المصحف .. و بيمشوا علي رجليهم " اذا سأحكي لكم قصه تبين ما معني هذا العنوان.

 ( ياسر شاب في العشرين من عمره طويل القامه طالب بكلية الاقتصاد و العلوم السياسيه لديه العديد من الاصدقاء ، اجتماعي بدرجه كبيره ترتب علي ذلك ان لديه عديد من الاصدقاء المختلفين كلياً فمنهم من يطلق علي نفسه شيخ و دائماً ما يتواجد بالمساجد و منهم من يعيشوا حياتهم كما يحلوا لهم و يرتكبون الكثير من الاخطاء ولا يفارقون المخدرات التي يجدوا فيها لذة " الكيف " لديه من الاصدقاء من ابناء جميع الطبقات .

اما ياسر فهو إنسان وسطي يحافظ علي صلاته و ايضا يعيش حياته كما يحب و يعمل ب " اعمل لدنياك كأنك تعيش أبدا , و اعمل لآخرتك كأنك تموت غدا ".

ذات مره خرج ياسر مع اصدقاءه احباء المخدرات او كما يقول لهم " يا عيال ضايعه " فوجد ياسر نفسه كلما اجتمع معهم يشعرونه بأنه " الشيخ بتاعهم " و يطلقون عليه محترم القعده و يستفسرون منه في علي اشياء كثيره .

و عندما خرج مع اصدقاءه الشيوخ ... فأشعروه بأنه فاسد لأقصي درجه و انه مغيب ولابد ان يعود لثوابه !
  
اما عن السياسه فهو شاب لا يتبع  اي تيار و لكنه لديه وجهة نظره
ثم خرج مع اصدقاؤه رواد السياسه من الاخوان فوجدهم يطلقون عليه يا ليبرالي يا مغيب يا عدو الدين 
و اذا خرج مع اصدقاؤه رواد التيار الليبرالي فوجدهم يقولوا له " يا اخواني يا متخفي  الخ 

=== اذا 
فياسر هو ياسر كما هو لم يتغير سواء هنا او هناك فهو تصرفاته ثابته و لكنه وجد نفسه في مكان فاسد و في مكان شيخ اذا فالناس ترا بأعينهم و ليس بأعين الواقع .. اذا عزيزي القارئ لا تدع رأي الناس يعنيك و كلام الناس يؤثر فيك بالسلب اعمل ما تحب مادام مش غلط فأنت حر ما لم تضر :).

ملحوظه : وربنا انا منا ياسر و لا فيه شبه مني قبل ماحد يقول دي حاله تصوريه بوصل بيها فكره :D

عن اخر ايام امتحانات الترم الاول

ذات مومنت لما تسمع انهم في الجراحه هيقللوا من درجات الشفوي بالسالب من غياب المحاضرات

يو فيل لايك
ضربو الاعور علي عينه :/

من الجميل في الامر ان د مشيره بتقول ان فيه ناس ناجحه بيبر دواجن بحل سؤالها بس :)

اخدناها زمان في الكلاس ... اخر ماده مابتتذكرش

من المعديه للمشتركه ... من ٥٠ مرض ل ٢٢ مرض .. من التنشين لعدم المذاكره اصلا :D

في الشفوي هيبقي يوم ٢٤ لو اتسألت في السياسه بنسبة ٩٠ في الميه الدكتور اللي بيسأل بيكون اخوان علشان هما يهمهم يعرفوا راي الشباب في الحكم و كده
ساعتها جاوب - مرسي ماخدش فرصته و الناس مش سايبينه عارف يشتغل - هتاخد ٩ حتي لو ماجوبتش متجربه - ابيع نفسي لأول مشتر اتِ :D - ( الا لو دخلت ل د وليد ده من مؤسسي حزب الدستور :) )

اخر كام امتحات اثبت ان الناس اللي بتحضر محاضرات دي بتبقي داخله عارفه نص الامتحان - بس ده مايمنعش ان عددهم مش هيزيد برده

لما دكتور اكسترنال في الشفوي بيسأل تقديرك ايه نفسي اسمع حد بيقول تقديره الحقيقي :

معنديش امتحان الاسبوع اللي جاي ... احساس مفتقدينه من شهر نوفمبر سنه ٢٠١٢ =)

مش فاهم ايه المشكله لو ابقي اللقسام كلها زي المشتركه و كمان رئيس القسم يدخل يقولك اكتبلي بس اي حاجه في الورقه

امتحان الشفوي ب ٢٠ في الميه بس فقد رونقه كده معدش حد بيحطله اعتبار
-يمكن عشان الامتحان الصبح كله عاوز يخلص منه عشان يراجع او عشان يركز في النظري
- ربما لاننا فعلا دخلنا عدد كبير من الامتحانات الشفوي و الموضوع بقي ايلاستك ( اشك في دي )
- جايز جداً اننل بقينا عارفين ان الشفوي مش بالاجابه لا ده بالدكتور اللي انت داخله ( مثلا لجنتي في الولاده د عصام مدي كله ٩-١٠ و اقل حاجه ٨ - نفس اللجنه دي كلها جايبه في المعديه من ٦-٧ مع ان الدكتور كان بيقول اسأل نفسك سؤال بس اهي غتاته )

الامتحانات في مدرج الولاده ده من اسوأ الاخترعات اللي عرفتها الكليه شئ فصيل في عزله

الناس الللي بتزهأ من المذاكره عادة بيبقي عندها مشكله مع اخر صفحه في كل ملزمه

( البتاعه دي شوفتها قبل كده ) كلمه بتقولها لنفسك في الامتحان و ساعات بتقول ايوه في يمين الصفحه من تحت بس كانت تبع ايه ؟ :(

الاربع او خمس ساعات بتوع الصبح دول لولاهم الواحد مكانش حل حاجه في نص المواد

بقي عندنا قدره عاليه ع الفتي او بمعني اصح بقي صعب جدا نسيب حاجه فاضيه في الورقه ... الفتي اسلوب حياه

الشهر ده ممكن ندخل بيه موسوعة جينيس للارهاق و القلق و التوتر =)